“Dong ma Gakni Deba … Maila Marsahap Simalungun”
Sinuratkon ni: Bapa Mansen Purba SH 
BANI ujung ni tahun 2005 ondi, na so iagak uhur, sanggah hubuka kotak surat-e (email), jumpah au ma dong hape roh surat-e ni sindohorhu. Hun Kualalumpur do ia manongos surat-e in, sanggah ipardalanan laho hu Eropa. Nini bani surat in, tarjolma do ia dob ibotoh humbani hasomanni, na adong hape sada badan (internasiona) na mamongkuthon horja parorotkon sahap ni buei bangsa i tanoh on. Tarlobih ma ai sahap na laho magou mando halani lang iramotkon be, lang be homa sai ipakei simada sahap ai. Lanjar nini ma, na porlu do hape iramotkon sahap Simalungun, i rumah barang i Sikolah Minggu.
Irik ma ipindohon ase namin na arahkon piga-piga hasoman mansahapkon horja pengembangan sahap Simalungun. Na songon pamungkahni, ai ma mambahen buku parlajaran sahap Simalungun sipakeion ni parsahap Indonesia, ai ma songon niombahta sonari on, simbalogta barang partoloh na roh hu Simalungun, dihut age bani Pandita na sihol marsahap Simalungun.
Mintor tongkinin do hutongos balosku marhitei surat-e. “Dear tumang ma ai,” ningku. Lanjar hupatugah ma homa marhitei internet surat-e ni in hu piga-piga hasoman. Malas uhur, dear bei do balos ni sidea. Gariada dong do sada Pandita mangkatahon, “Dear ma ai. Au ma sada na porlu marlajar sahap Simalungun, ai anggo marambilan au, lang ptah marpasir-pasir sahap Simalungun, tapi marbatu-batu do.” Sanggah marsibalos-balosan surat-e hanami, mulak ratah ma pardingatku pasal panramotkon bani sahap Simalungun.
Marhitei na mambasa barita ni sahap Simalungun sonai age Surat-19, soppata dohupanariankon pasal pardalanan ni sahap Simalungun. Dob lambin huparuhurhon, hudidah ma sonaha pardongni das hu bani sondahan on.
Naija, paima roh surat Malayu (Arab) pakon surat Latin pakon sahap Toba na iboan Guru Zending, bilei ma Surat-19 pakon sahap Simalungun. Ai lang be ipakei sahap Simalungun. Tapi sahap Toba, gariada sundat do sikolahni anggo lang pandei marsahap Toba. Marsahap Malayu atap sahap Bulanda ma homa administrasi pemerintahan.
Diatei ma tubuh uhur ni Pdt J Wismar Saragih ondi pagoluhkon sahap Simalungun.Sanggah sikolah ia i Sipoholon, ipungkah ma sahalaksi mangalimkon piga-piga doding humbani Buku Ende hu bani sahap Simalungun. Ai ma na pamungkahni dong bukku doding “Haleluya”. Dob ai gomos janah golgol ma ipindohon bani Zending sonai age bani pamarentah ase ipakei sahap Simalungun i parsikolahan. Ipadihut ma homa Raja-raja na i Simalungun pagomoskon pangindoan in.
Soppat do dong na mangambati marhitei na paotikkon bilangan ni bangsa Simalungun, halani ai ma gan lang porlu paroroton sahap Simalungun. Isuhar ma homa in marhitei na patugahkon bilangan ni halak Simalungun bani surat kabar. Dob ni saud ma ihadearjon pakeion sahap Simalungun. Naibata pe marsahap Simalungun ma bani halak Simalungun. Ai saud do dong hata ni Naibata (Bibel) sahap Simalungun. Ipatuduh Naibata do homa na lambin doras tambah bilangan ni na porsaya Bani dob marbahasa Simalungun Naibata padashon hataNi.
Ipudi ni ari, surut ma use panramothonon bani sahap Simalungun. Na dob soppat hinan marsahap Simalungun i parsikolahan, soppat ma homa lang be. Dob gomos use ipindohon bani Pamarentah, gabe sonari on gakni domma ipungkahkon use ase dong buku parlajaran sahap Simalungun i parsikolahan. GKPS ta pe lambin marassah ma manramotkon sahap Simalungun.
Etah marsahap Simalungun loo…
Gakni namin, dihut ma deba ai akkap porlu ni uhur padashon hata ni Naibata hu bani pagori ni Kuria in na lambin buei lang be marsahap Simalungun. Akkap porlu ni uhur, hotop hita mangajamkon hapandeionta padaskon, gabe iparnalang hita hagogohon ni Tonduy Napansing padashon hata ni Naibata. Hape, pori dong halak Simalungun na ijia roh sanggah Pentakosta i Jerusalem (Lah 2:1-13), seng anjai lang ibagas sahap Simalungun do ibogei ambilan mansahapkon habanggalon ni Niabata, ai ganup do mambogei ibagas hata ni tanoh hatubuhanni bei.
Dong ma gakni deba ai ase marhagogohon ambilanni, gabe ipamasuk ma bagei hata sileban, iagu ma ai padashon hata ni Naibata. Dobni usih songon hata tabas sapari ondi, ase marhagogohon tabasni ipakei ma sahap sileban (sahap Arab, Malayu, Mandailing, Toba pnl sangkababah bei), gendo marhitei sonai tarontang hagogohon hun deisa na ualuh pagogohkon tabasni in.
Dong ma gakni deba ai na maila marsahap Simalungun. Hape namin patut do jagar janah tongam pangahapni marsahap Simalungun, ai Naibata pe marsahap Simalungun do manisei (sanggah Simalungun dondi Ia).Sipata tubuh do sungkun-sungkun ibagas uhur, ia sanggah ujian Sarjana, maningon torsa do sahap Indonesia ni skripsini; na laho marlajar hu luar negeri, maningon botoh do ia sahap Inggris. Hape laho horja i GKPSimalungun, boi do age marpasir-pasir dassa ibotoh marsahap Simalungun.
Age pe sonai, malas do uhur, sai dong do hape na mangkahoruhon perkembangan ni sahap Simalungun in. Andohar ma hunjon hujanan lambin dong na ra heja parorothon sahap Simalungun. Ulang namin gap iparleilei hita mansiatkon diri hu hasadaon Indonesia atap dunia on (globalisasi), lupa hita mangkargahon na dob hinargahon ni Naibata, ai ma sahap Simalungun pakon halak Simalungun.
Judul asli artikel, “Marsahap Simalungun” ibuat hun Situs GKPS (http://www.gkps.or.id/) 8 February 2006.
