Custom Search

Turiturian Parmulani Laut Tadur

Oleh: Masrul Purba Dasuha, S.Pd
(Telah Diterbitkan Di Majalah Sauhur Edisi X Tahun 2008)
laut-tadur1

Legenda Laut Tadur di Simalungun: Gambar 1: Laut Tadur tahun 1903-1920

Gambar 1: Laut Tadur tahun 1903-1920

Nagur Masrul gbr 2Sapari adong ma sada huta na ginoran Tadur, buei do pangisi ni huta on. Na ginomgomni morga Damanik. Anggo pansarianni sidea bagei do, adong na marjuma, maragad, mambayu, anjaha bahat horja na legan songon na somal ihorjahon ompungta sapari. Bahat do halak na sihol marianan ijon. Bani sada panorang misir ma sidea marharoan hu juma, ganup humbani paramangon, parinangon, garama, ampa anak boru, pitah dakdanak do hansa na tading i huta. On ma gatni na ginoran sapari horja sahuta.

Lahouhonsi sidea, puar ma dakdanak nokkan marguroui. Adong ma sahalak na marsahap, “Ai manggual ma gelah hita!, aha be nari gurou-gurouon….???”. Ibalosi hasomanni ma “Anggo sonai etah ma…!”. Igualhon sidea ma tongon gondrang ia, adong koma na marsulim ampa marsarunei. Hape songon na lepak ma tangaron inggouni, “matornoh ho tadur……matornoh ho tadur…!” sonai ma inggouni. Haru ma pangahap ni parhuta simbalog mambogei ai, marsampang ma sidea, “Aih songon na lepak do bogeion inggouni gual on alo…!”. Seng piga dokah matornoh ma tongon huta ai halani lalap do idugut sidea manggual, tarsonggot ma ganup sidea mangidah, roh dokahni lambin roh hu toruhkon ma tanoh na idogei sidea anjanah mangihut ma homa sidea hu toruh. Marbirsaki ma bah ia lanjar lonop ma dakdanak nokkan iinsop bah ai, bungkulanni rumah pe seng taridah bei nai homa pinahan pe mogap ma. Saud ma tongon gabe bah bolag huta ai. Hunjai ma ase igoran huta ai Laut Tadur.

Mulakhonsi odoran hun juma ididah sidea ma dobma luhuk anjaha lonop huta ai, marhata bei ma sidea, “Ai mase boi gabe sonon hutanta on atene…?, dobma gabe bah alo”. “Huja do ale anakhu, rumahku, ampa pinahanhu ai….?” nini sidea ma. Adong ma pigapiga halak na manghatahon, “Mogap i bagas bah in ma gatni sidea ai”. Marsilumpat ma deba hu bagas lahou mangindahi anakni, seng adong bei biarni sidea mangidah bah ai. Hape dashonsi itoruh sahalak pe lang dong na bansah, ganup ma sidea mogap itolon bah ai. Janah na tading i datas sai doruh-doruh, seng ibotoh sidea bei aha nari na lahou sibahenon. “Lang tarurupi sidea be in, domma rongkap ni hutanta ma gatni on….”, nini sidea ma. Ninggan gabe homing do halak na matei ibagas bah ai, ai ma pangisini bah bolag on anjaha iporsayai halak do ronsi sondahan on boi mamberei tuah ampa pamalumhon naborit.
Ronsi sondahan on tingki bulan tula tarbogei do sorani gual hun laut ai. Ijia adong ma sahalak na margoran Tialam, boritan ma niombah ni. Adong ma uhur inanginangni ase ipatambarhon hu datu irik marbulawan ma sidea anggo malum holi sibaenon ma horja i bah bolag ai. On ma bonsir ni Laut Tadur on ijadihon ianan parbulawanon, anggo ijia dayok do na somal gabe parsombahan, tapi nuan boi do hambing, horbou atap lombu.
Bani taun 1955, adong ma tolu halak na marhasoman ai ma Bakhtiar Saragih, Hamid Damanik pakon Alamsyah Purba. Anggo hutani sidea, Bakhtiar par Bajalinggei do, Hamid pakon Alamsyah par Sappang Buahni Sipispis. Ibagas taun ai misir ma sidea hu huta Situnggung dohor Laut Tadur, parlangkahni sidea hujai lahou mamungkah parjumaan do. Alamsyah pakon Hamid dobma ongga hu Situnggung, Bakhtiar do hansa na lape, halak na dua ai do na mangharahkonsi. Bani sada panorang lahou ma sidea marhotang (hotang on lahou mambaen bubu pakon tampirei baen panangkap ihan i Bah Situnggung), marsahap ma sahalak humbani na tolu ai, “Hu Laut Tadur malah hita marhotang tene ase boi mangan ihan holi hita ijai”. Lahou ma tongon sidea hujai pitah indahan pakon lansina tinuktuk do hansa iboan baen bohal.
Dashonsi ijai ipatumpu sidea ma hotang, marsitorih hotangni bei ma sidea. Tongahni ari marsaran ma sidea. Parsaranan ni sidea on seng pala daoh be hun Laut Tadur, martaur ma sahalak humbani sidea, “Sungkup ma gatni hotang on atene, manghail ma lobei hita”. Sanggah na manghail ai dapot si Hamid ma tungkul ni jagul, Alamsyah dapot sipusipu, anjaha Bakhtiar dapot ihan samasam piripiri. Longang bei ma sidea mangidah ai, mardogir ma ambulu tangkuhuk ni sidea, sanggah manghail iahapkon sidea do songon na iharat ihan do ompan ni hape dob ipasintak hape legan do na dapot. Surdung mata ni ari mulak bei ma sidea, sanggah ibagas pardalanan kahou ma sidea, si Hamid do si pamboan dalan na parlobei, dobhonsi ai igantihkon ma use pakon si Alamsah, hape seng homa dapot dalan mulak.
Parpudi igantihkon ma pakon Bakhtiar, ilajou sidea ma use mamontasi dalan, mangindou tuduhtuduh ma ia hubani begu-beguni ompung ni sapari, dobhonsi ai panal ma taridah dalan, seng piga dokah das ma sidea. Dashonsi i Situnggung pajumpah ma sidea pakon ompung Sari Bulan Purba ipatorang ma hubani pasal na masa ai, iturihon ompung ai ma hubani sidea turiturian ni Laut Tadur nokkan.
Laut Tadur on nuan masuk 2 kacamatan ai ma Kecamatan Dolog Batu Nanggar Kabupaten Simalungun pakon Kecamatan Sei Suka Kabupaten Batubara, i topi ni laut on nuan dobma gabe hobun ai ma Hobun Laut Tadur.
——————————————————————————————————————————————-